Það verður ekkert viðbótarframlag í lífeyrissjóð fyrir mig takk fyrir þegar ég hef aftur störf á RÚV á morgun. Nei minn kæri Árni MMMMMM, þú getur tekið þessar krónur út í sjoppu og keypt þér kúlur fyrir allan peninginn. Verði þér að góðu. Ellihýruna mína má sjá á meðfylgjandi mynd. Þarna sést Þórbergur Guðmundsson, aka grænmeti jr., sýna ofurmannlega takta á knattspyrnuæfingu í Noregi og ef svo fer fram sem horfir þá verður drengurinn fljótlega farinn að þéna á atvinnumennsku í norsku úrvalsdeildinni. Ég get síðan haft gott upp úr því með því að skrá hjá mér öll útgjöld tengd drengnum svo ég geti þá rukkað hann um þau seinna. Svo get ég selt gamla fataleppa af honum, leikskólateikningar og skólaföndur á e-bay á uppsprengdu verði. Þá eru minn lífeyrissparnaður kominn á hreint.
Ég fyllist dásamlegu mikilmennskubrjálæði þegar ég er nefndur á nafn í fjölmiðlapistlum Ólafs Teits Guðnasonar í Viðskiptablaðinu. Nú birtist nafni mitt á lista með mönnum eins og Helga H. Jónssyni, fyrrum yfirmanni Fréttastofu Sjónvarps, Kára Jónassyni, ritstjóra Fréttablaðsins, Óðni Jónssyni, yfirmanni Fréttastofu Útvarps, Pétri Gunnarssyni, fréttastjóra Fréttablaðsins, Styrmi Gunnarssyni, ritstjóra Morgunblaðsins, og Þorsteini Pálssyni, ritstjóra Fréttablaðsins. Og hvað eigum við sameignlegt? Jú, við erum allir gott dæmi um starfandi fréttamenn sem tóku eitt sinn þátt í stjórnmálum. Ég hlýt að eiga að kunna leynilegt handaband.